Graphite Pencil နဲ့ Charcoal Pencilတူလား? ဘာကွာလဲ? (Graphite vs Charcoal Pencil)

Graphite Pencil နဲ့ Charcoal Pencilတူလား? ဘာကွာလဲ? (Graphite vs Charcoal Pencil)

.

Beginner တစ်ယောက်အနေနဲ့ ပုံစဆွဲတုန်းက မျက်လုံးအိမ်တွေ၊ ဆံပင်တွေ၊ ဒါမှမဟုတ် ညဘက်ရှုခင်းတွေဆွဲတဲ့အခါ အမည်းဆုံးဖြစ်ချင်လို့ 12B ခဲတံကြီးနဲ့ အားရပါးရ ဖိဆွဲဖူးကြလား?

.

ဒါပေမယ့် ကိုယ်လိုချင်တဲ့ အမည်းရောင်စစ်စစ်မထွက်ဘဲ ခဲရောင်တွေက ပြောင်လက် (shiny) ဖြစ်ပြီး ဘေးစောင်းကြည့်လိုက်ရင် အလင်းတွေပြန်နေတာမျိုး ကြုံဖူးကြမှာပါ။ အဲ့လိုဖြစ်တဲ့အချိန် တကယ်စိတ်မကောင်းဖြစ်တတ်တယ်… Admin ကိုယ်တိုင်လဲ ပန်းချီစဆွဲတုန်းက ဘာလို့ဒီလိုဖြစ်မှန်းမသိဘဲ အကြိမ်များစွာကြုံဖူးတယ်။

.

တကယ်တော့ ဒါဟာ ကိုယ့်အမှားမဟုတ်ဘဲ ကိုယ်သုံးနေတဲ့ Material ရဲ့ သဘာဝကို မသိသေးလို့ပါ။ ဒီနေ့တော့ Admin မိတ်ဆွေတို့ကို အများဆုံး ရောထွေးတတ်ကြတဲ့ "Graphite Pencil နဲ့ Charcoal Pencil ဘာကွာလဲ?" ဆိုတဲ့ လျှို့ဝှက်ချက်လေးကို ရှင်းပြပေးမယ်နော်။

.

 Graphite Pencil

===============

ကျွန်တော်တို့ ငယ်ငယ်ကတည်းက သုံးခဲ့တဲ့ ခဲတံတွေရဲ့ အဆင့်မြင့် Version လို့ ပြောလို့ရတယ်။

.

သဘာဝ: ဆွဲလိုက်တဲ့အခါ ငွေမှင်ရောင် ပြောင်လက်လက် (Metallic Shine) လေး ဖြစ်နေတတ်တယ်။ အမည်းဆုံး 12B တောင်မှ Charcoal လောက် နက်နက်မှောင်မှောင် မထွက်ဘူး။

.

အားသာချက်: ခဲဖျက်နဲ့ ဖျက်ရလွယ်ကူပြီး ထိပ်ချွန်လို့ကောင်းတဲ့အတွက် မျက်တောင်၊ ဆံပင် စတဲ့ အသေးစိတ်အချက်အလက် (Detailing) တွေဆွဲဖို့ အကောင်းဆုံးပဲ။

.

 Admin ရဲ့ Secret Tip: အခုနောက်ပိုင်း အလင်းမပြန်တဲ့ Graphite မျိုးကို လိုချင်တယ်ဆိုရင် Staedtler Black Edition လေးတွေ ရွေးသုံးလို့ရတယ်နော်။

.

 Charcoal Pencil

===============

မီးသွေးကို အခြေခံပြီး ပြုလုပ်ထားတဲ့အတွက် Graphite နဲ့ လုံးဝကို မတူတဲ့ ရလဒ်ကို ပေးတယ်။

.

သဘာဝ: သူကတော့ လုံးဝမပြောင်ဘူး။ Matte Finish လို့ခေါ်တဲ့ နက်မှောင်ခြောက်သွေ့တဲ့ အမည်းရောင်စစ်စစ်ကို ရစေတယ်။

.

အားသာချက်: အရမ်းကို နက်မှောင်တယ်။ အမှောင်ထု (Deep Shadows) တွေကို ပီပီပြင်ပြင် ဖော်ပြချင်တဲ့အခါမှာ Charcoal ကို ဘယ်အရာကမှ မယှဉ်နိုင်ဘူး။ အမှုန့်ထွက်တာများတဲ့အတွက် Blending Stump နဲ့ ပွတ်ပြီး Shadow တွေ အုံလိုက်ချဖို့ အရမ်းအဆင်ပြေတယ်။ (ပေကျံလွယ်လို့တော့ သတိထားရမယ်နော်)

.

 ဒါဆို ဘယ်အချိန်မှာ ဘာကို ရွေးသုံးမလဲ?

 Graphite Pencil ကို ရွေးသင့်တဲ့အချိန်

အသေးစိတ် (Details) ဖော်ချင်တဲ့အခါ: မျက်တောင်တစ်မှင်ချင်းစီ၊ ဆံပင်အမျှင်လေးတွေ သေသေချာချာ ဆွဲမယ်ဆိုရင် Graphite က အကောင်းဆုံးပါ။

.

ပုံကြမ်းဆွဲတဲ့အခါ: ခဲဖျက်နဲ့ ဖျက်ရတာ လွယ်ကူစင်ကြယ်တဲ့အတွက် ပုံရဲ့ Outline အကြမ်းကို Graphite (HB ဒါမှမဟုတ် 2B) နဲ့ စတင်တာ ပိုစိတ်ချရတယ်။

.

သန့်သန့်ရှင်းရှင်း ဆွဲချင်တဲ့အခါ: လက်နဲ့ပွတ်မိရင် ပေကျံမှုနည်းနည်းပဲ ဖြစ်ချင်တယ်ဆိုရင်တော့ Graphite ကိုပဲ ကိုင်လိုက်ပါ။

.

 Charcoal Pencil ကို ရွေးသင့်တဲ့အချိန်

အမှောင်ထု (Deep Contrast) ပြချင်တဲ့အခါ: ညဉ့်နက်တဲ့ပုံရိပ်တွေ၊ အရိပ်ပြင်းပြင်းတွေနဲ့ ပန်းချီကားကို အားကောင်း (Bold) စေချင်ရင် Charcoal ကို ရွေးပါ။ Graphite က 12B အထိ သုံးသုံး Charcoal ရဲ့ အမည်းစစ်စစ်ကို မယှဉ်နိုင်ပါဘူး။

.

ခံစားချက်အပြည့်နဲ့ ဆွဲတဲ့အခါ: အုံလိုက်ကျင်းလိုက် အရိပ်တွေ ချချင်တယ်၊ Expressive ဖြစ်ချင်တယ်ဆိုရင် Charcoal က ပိုပြီး အနုပညာဆန်တယ်။

.

Matte Finish လိုချင်တဲ့အခါ: ပုံကို ဓာတ်ပုံရိုက်ရင်ဖြစ်ဖြစ် ခဲရောင်ပြောင်ပြောင်ကြီး (Sheen) မဖြစ်စေဘဲ ခြောက်သွေ့တဲ့ အမည်းရောင်စစ်စစ်ကို လိုချင်ရင် Charcoal က အဖြေပါပဲ။

.

 Graphite နဲ့ Charcoal ကို ဘယ်လိုတွဲသုံးမလဲ? (Admin ရဲ့ Pro-Tips)

ဒီပစ္စည်းနှစ်ခုလုံးမှာ ကိုယ်စီအားသာချက်တွေ ရှိကြတယ်။ ဒါပေမယ့် သူတို့နှစ်ခုကို တွဲသုံးမယ်ဆိုရင်တော့ "အစီအစဉ်" က အရမ်းအရေးကြီးတယ်!

.

၁။ အရင်ဆုံး Charcoal နဲ့စပါ (Dark to Light Method): Graphite က အဆီပြန်တဲ့သဘော (Waxiness) ရှိတယ်။ Graphite ကို အရင်ဆွဲပြီးမှ Charcoal ထပ်တင်ရင် ချောမွေ့တဲ့ မျက်နှာပြင်ပေါ်မှာ Charcoal မှုန့်တွေက ကပ်မနေဘဲ ပြန်ကွာကျတတ်တယ်။ ဒါကြောင့် အမှောင်ဆုံးအပိုင်းတွေကို Charcoal နဲ့ အရင်စပြီး နေရာချပေးပါ။

.

၂။ Graphite နဲ့ အချောသတ်ပါ (Detailing): Charcoal နဲ့ အမှောင်ထုတွေ ဖော်ပြီးသွားပြီဆိုမှ အပေါ်ကနေ Graphite နဲ့ အသေးစိတ်လိုင်းတွေ (ဆံပင်အမျှင်လေးတွေ၊ မျက်တောင်လေးတွေ) ကို လိုက်ဖြည့်ပါ။

.

၃။ Blendingပြုလုပ်ခြင်းကို သတိထားပါ: နှစ်ခုကို ရောပွတ်လိုက်ရင် တခါတလေ အရောင်က ညစ်ပတ်သွားတတ်တယ်။ ဒါကြောင့် ကြားထဲမှာ Kneaded Eraser (ခဲဆွဲဖျက်) လေးကို သုံးပြီး အရောင်ကူးပြောင်းမှုကို ထိန်းညှိပေးပါ။

.

၄။ Fixative ကို အသုံးချပါ: Charcoal ဆွဲပြီးတဲ့အခါမှာ Fixative Spray တစ်ချက်လောက် ခပ်ပါးပါးလေး ဖြန်းပေးပါ။ ပြီးမှ အပေါ်ကနေ Graphite နဲ့ ထပ်ဆွဲမယ်ဆိုရင် ပုံက ပိုပြီး စင်ကြယ်သပ်ရပ်သွားပါလိမ့်မယ်။

.

 Admin ရဲ့ အပိုဆု Tip: မြန်မာနိုင်ငံလို စိုထိုင်းဆများတဲ့ ရာသီဥတုမှာ Charcoal တွေက မှိုတက်လွယ်၊ အစိုပြန်လွယ်ပါတယ်။ ဒါကြောင့် မသုံးတဲ့အချိန်ဆို လေလုံတဲ့ဘူး (Plastic container) ထဲမှာ Silica gel ထုပ်လေးတွေထည့်ပြီး သိမ်းထားဖို့ အကြံပေးချင်တယ်။

.

ဒီအချက်လေးတွေကို သိထားရင် ပန်းချီကားတစ်ချပ်ထဲမှာပဲ Graphite ရဲ့ အသေးစိတ်ကျမှုနဲ့ Charcoal ရဲ့ နက်မှောင်မှု နှစ်မျိုးလုံးကို အကောင်းဆုံး ပေါင်းစပ်နိုင်သွားပြီပေါ့။ မိမိဖန်တီးချင်တဲ့ စတိုင်ပေါ်မူတည်ပြီး အသုံးပြုသင့်တဲ့ပစ္စည်းကို မှန်ကန်စွာ ရွေးချယ်တတ်ဖို့ကလည်း အနုပညာကျွမ်းကျင်မှု တစ်ခုပါပဲ။

.

မိတ်ဆွေတွေကော အရင်က ခဲရောင်တွေ အလင်းပြန်ပြီး အခက်တွေ့ဖူးလား? အခုလက်ရှိ သုံးနေတဲ့ ခဲတံကကော ဘာအမျိုးအစားလဲဆိုတာ Comment မှာ ဆွေးနွေးသွားခဲ့ပါဦး။

.

.